Сұрақ: Шетелдік шейхтардың пәтуасын басшылыққа алуға бола ма?
Жауап: Пәтуа сөзі арабтың шешім, қорытынды, түсіндіру деген мағыналарды білдіреді. Яғни, діни-құкықтық (шариғи үкімдерді түсіндіру) қорытынды.
Қазіргі таңда жастарымыз түрлі шетелдік шейхтарға еліктеп, өз бетінше діни пәтуа беріп, қоғамда діни танымдық пікір қайшылығын туғызып отыр. Оның салдары дінараздық алауыздыққа соқтырып жатқаны белгілі. Осындай діни алауыздықтың алдын алу мақсатында Қазақстан мұсылмандары діни басқармасының негізгі бағытының бірі – қоғамдағы діни мәселелердің шариғат тұрғысынан үкімін айтып, пәтуасын шығару.
ҚМДБ-ның жанындағы Ғұламалар кеңесі пәтуа мәселесінде Құран кәрімді, Пайғамбарымыздың (с.а.у.) хадисін, жергілікті халықтың салт-дәстүрі мен Әбу Ханифа мәзһабы, Әбу Мансұр Матуриди сенім мектебінің ілімдерін негізге алады.
«Нахл» сүресінің 43-аятында: «Егер білмесеңдер, онда білім иелерінен сұраңдар» деген. Жергілікті ғалымдардың пәтуаларына жүгініп, адасушылықтан сақтанғанымыз абзал!
Икрам АЙТАЕВ
