Бірнеше кісі ардақты сахабалардан кейінгі табиғиндердің бірінің үйіне қонаққа барған екен. Үй иесі, яғни табиғин кісі келген қонақтарына дастарханға қоятын ешнәрсесі болмағандықтан жақын тұратын досының үйіне барады. Досын үйінен таппаған ол үйге кіріп асулы қазан, піскен нан тағы басқа жейтіндерді көреді. Барлығын көтеріп алып, үйіндегі қонақтарына ұсынып, жегізеді.
Әлгі досы үйіне келсе ештеңе таппай қалады. Көршілерінен сұрастыра келе «Пәлен деген досың алып бара жатқан» дегенді естігенде «Дұрыс жасаған» дейді де қояды.
Ертесі күн досына жолыққан ол: «Уа, достым, егер қонақтарың тағы келсе, тағы да ала бер» деген екен.
* * *
Бір топ кісі Суфиян Сәуридің (р.а.) үйіне барады. Ол кісіні үйінен таппайды да, өздері есікті ашып, дастарқанды жайып ішіп-жей бастайды. Сол сәтте үйге кіріп келген Сәури: «Сендер бұрынғы салих кісілерді есіме түсірдіңдер. Олар осындай еді» дейді.
Дайындаған – Тұрар ТҮГЕЛҰЛЫ
kazislam.kz
