Осындай атаумен Шымкентте алғаш рет отбасы институтын дамыту мақсатында форум өтті. Форум мақсаты – қоғамда басты құндылықты арттырып, ұрпақтар сабақтастығын насихаттау, деп хабарлайды BAQ.KZ.
Іс-шараға қатысқан қала әкімі Мұрат Әйтенов отбасы институтын қолдау мен нығайту мәселеріне тоқталды.
Отбасының беріктігі оның әлеуметтік жағдайымен ғана өлшенбейді. Сондықтан, отбасы институтын қолдау тек мемлекеттің, мемлекеттік органдардың міндеті деп қарауға болмайды. Мемлекеттен қаншама қолдау болғанымен адам өз отбасын сақтап, дамытуда жауапкершілік сезінбесе, миллиардтап бөлініп жатқан қаржы мен мемлекеттің қамқорлығы түкке де тұрмайтынын түсінуіміз қажет. Баршамыз күш біріктіре отырып, жас ұрпақты өз отбасына жауапкершілікпен қарайтын азамат етіп тәрбиелеп шықсақ, нағыз үлкен жетістік сол болмақ. Өйткені, отбасына жауапкершілікпен қараған азамат Отанына да адал қызмет етеді, – деді қала әкімі.
Форумға «Мерейлі отбасы» жобасының қатысушылары, аудандардың үздік отбасылары, жаңадан шаңырақ көтерген жастар қатысты. Еркін форматта ұйымдастырылған диалог алаңында отбасы институтына қатысты проблемалар ашық талқыланды. Жиын барысында арнайы шақырылған спикерлер мен зиялы қауым өкілдері жастар тәрбиесіне қатысты пікір айтып, салиқалы ойларын ортаға салды.
Сондай-ақ қоғамда отбасы құндылықтарын насихаттауда, отбасы институтын дамытуда туындаған өзекті мәселелер талқыланып, ұсыныстар сарапқа салынды. Форум аясында қала тұрғындарының үздік отбасы болуға деген ынтасын арттыру үшін «Үздік отбасы» премиясы тағайындалды.
Салтанатты жиын жергілікті өнерпаздардың концертіне ұласты.
