Бұл сертификаттың құндылығын сөзбен жеткізу мүмкін емес. “Нұр-Мүбарак” университетінде көру мүмкіндігі шектеулі және зағип жандарға арналған алғашқы курстың түлектері екі аптада едәуір білімге ие болғанын айтып, өзара қуаныштарымен бөлісуде. Олар маусымның 15 – 30 аралығында Құран әліппесі, тәджуид ережелері (Брайль әліппесімен), ақида, фиқһ, Құран тәпсірі дәрістерін өтті.
Курс түлектеріне сертификат табыстау салтанатында проректор, PhD доктор Қайрат Құрманбаев барлық қатысушыларға жылы лебізін білдіріп, білім жолындағы мұсылманның мәртебесіне де тоқталды. Көз жанарынан айрылса да, көңіл шырағы нұрға бөленген ізгі жандарға ризашылығын білдіріп, сертификаттарды табыс етті.
Бұл курсқа өзбек, шешен, түрік отандастарымыз, сондай-ақ көрші Қырғыз елінен арнайы келген білім ізденушілер де бар. Олардың барлығы курс ұйымдастырушыларына ризашылықтарымен қатар жылы, жұмсақ жатын орын, ас-ауқатпен қамтамасыз етіп, білікті ұстаздардан дәріс алғандарына ерекше алғыстарын жеткізді. Курсқа жетекшілік жасаған Нұр-Мүбарак университетінің түлегі, әлемдік Малайзия Ислам университетінің магистрі, Брайль оқуына маманданған Асқан Шакировқа жылы лебіздерін жаудырды.
Проректор Қ.Құрманбаев барлық қатысушылардың талап-тілектерін тыңдауға әрдайым дайын екендіктерін айта келе, болашақта да білім беруге қатысты осындай жобалар жасау жоспарда барын жеткізді.
“Нұр-Мүбарак” университетінің баспасөз қызметі
