Сұрақ: Көп күлу харам ба?
Жауап: Ислам мейірім және ізгілік пен бейбітшілік діні болғандықтан, адамдар бір-біріне жұмсақ әрі жылы қатынаста болады. Мұсылман – жылы жүзді жан. Тіпті Алла елшісінің (с.ғ.с.): «Бауырыңның жүзіне күлімсіреп қарауың – садақа», – деп айтқан мәшһүр хадисі бар.
Ислам мұсылманды мейірімді әрі жұмсақ мінезді болуға шақырады. Біреуге жақсылық жасап садақа беру үшін ақшаның қажеті жоқ, жәй ғана күлімсіреп қарасаң жетіп жатыр дейді. Өйткені сенің күлімсіреп қарауың басқа адамға күні бойына жақсы көңілмен жүруге себеп болмақ. Мысалы, Кағб ибн Малик (р.ғ.): «Алланың елшісі (с.ғ.с.) егер қуанса оның жүзі нұрланып, айдың бір бөлігі секілді болатын», – деген риуаятты жеткізген (Бұһари).
Бірақ, дінде күлудің орны мен жөні де бар екенін естен шығармаған жөн. Сол үшін пайғамбар (с.ғ.с.): «Күлкіден сақтаныңыз. Күмәнсіз, көп күлкі жүректі өлтіреді», – деп насихат еткен (Термези).
Бұл жерде мқсылман адамның орынсыз, жөнсіз және жиі күле бермеуі айтылып отыр. Көп күлкі адамның абыройын, жора-жолдастар арасындағы қадірін кетіреді. Көп күлетін адамның сөзі жеңіл келеді, ондай адамнан салмақты сөз де шықпас.
Сол үшін де исламда күлудің әдептері бар. Мысалы, ислам біреуді мазақ етіп күлуге, келемеждеуге, табалап күлуге және сол сияқты т.б. күлкі түрлерінен сақ болуға шақырады.
Жалғас САДУАХАСҰЛЫ
