Сұрақ: «Жүрекпен көру» дегеніміз не?
Жауап: Алла Тағала кейбір кісілерге «алтыншы» түйсікті нәсіп ететіні рас, оны кейде «жүрек көзі» немесе «көкейкөз» яки «ішкі түйсік» деп те жатады. Исламда мұндай ерекшелік құлшылықта ықыласты, тақуа, Алланың достары мен әулиелерде болып тұратын жағдай. Мұндай адамдарға ғайыптың пердесі ашылады деп айтады, яғни, адам кәдуілгі көзбен көре алмайтын дүниелер мәлім болады.
Мысалы, Әли ибн Әбу Талибтің (р.а.) басынан өткен оқиғада былай делінеді:
«Омар ибн Хаттабтың (р.а.) халифалық кезінде мен түс көрдім. Түсімде Алла елшісінің (с.ғ.с.) артында тұрып, таң намазын оқығандай болдық. Намазды тәмамдап, мешіттің есігіне беттеген кезімде, ауызда тұрған бір әйелді көрдім. Оның қолында бір леген құрмасы бар. Ол:
– Ей, Әли! Мына легенді алып, Алланың елшісіне (с.ғ.с.) бер. Құрманы өз сахабаларына таратып берсін, – деді.
Мен құрманы алып, Алла елшісінің (с.ғ.с.) алдына қойдым. Ол өзінің шарапатты қолдарымен бір түйір құрманы алып, менің ауызыма салды. Мен:
– Уа, Алланың елшісі (с.ғ.с.)! Неткен дәмді еді. Тағы бірін салыңыз, – дедім. Бірақ, Алланың елшісі (с.ғ.с.) екінші құрманы бермей тұрып, таң намазына шақырылған азанның дауысынан ұйқымнан тұрып кеттім.
Сөйтіп пайғамбардың (с.ғ.с.) мешітіне бардым. Омардың (Алла оған разы болсын) артында тұрып, таң намазын оқыдым. Намазды болып, мешіттің аузына барғанымда қолында бір леген құрмасы бар әйелді көрдім.
Әйел маған:
– Ей, Әли! Мына легенді алып, мүминдердің әміріне бер. Ол құрманы өз жолдастарына таратсын, – деді. Мен құрманы алып, Омардың (Алла оған разы болсын) алдына қойдым. Омар бір құрманы алып, менің ауызыма салды. Мен оның дәмін татқан соң:
– Ей, мүминдердің әмірі! Тағы бір құрма берші, – деп өтіндім. Сол кезде Омар:
– Ей, Әли! Егер Алланың елшісі (с.ғ.с.) саған тағы бір құрма бергенде, әрине біз де берер едік, – деді.
Аң-таң болған Әли:
– Ей, Омар! Сен оны түсіңде көрдің бе әлде саған ғайыптан көрінді ме? – деп сұрайды.
Омар (Алла оған разы болсын):
– Уа, Әли, Аллаға қасам! Оны түсімде көргенім жоқ не ғайыптан хабар келген жоқ. Алайда егер мүміннің жүрегі шынайы Аллаға ықыластанса, онда Алланың нұрымен көреді, – деді».
Жалғас САДУАХАСҰЛЫ
