Жерден өсіп-өнген өсімдіктер, ұшқан құс, жүгірген аң, басқа да хайуандар мен қыбырлап жүрген құрт-құмырысқалар жаратушы иесі болған Раббыларын әрдайым зікір етеді екен. Сондай-ақ олар Хазіреті Пайғамбарды (оған Алланың салауаты мен сәлемі болсын) танып, Оған деген махаббатын ашық көрсеткен ғибратты оқиғалар да орын алған. Мұндай мұғжизалар мүминдердің имандарын қуаттандырары ақиқат. Осындай оқиғаның бірі әрі мәшһүр болған Ұхуд тауының сілкінуі еді.
Бір күні Хазіреті Пайғамбарымыз (оған Алланың салауаты мен сәлемі болсын) Хазіреті Әбу Бәкір, Хазіреті Омар және Хазіреті Әли (Алла олардан разы болсын) барлығы бірге Ұхуд тауына шыққан екен. Сонда Ұхұд тауы үстіндегі бұл адамдардың рухани салмағынан сілкіне бастапты. Сол кезде Пайғамбарымыз (оған Алланың салауаты мен сәлемі болсын):
«Тыныштал, ей, Ұхуд! Үстіңде бір Пайғамбар, бір Сыддық және екі шәһит бар!» (Тирмизи, 3703) – дегені сол-ақ еді, Ұхуд тауы тыныштала қалды.
Тек жансыз жаратылыс қана емес, хайуанаттар әлемі де басқа да жаратылыстар да Алланың Елшісін таниды, оны жақсы көреді, сыйлап, құрметтейді, оған мойынсұнады. Бізді қараңғылықтан құтқаратын Хазіреті Пайғамбарымыздың (оған Алланың салауаты мен сәлемі болсын) мына бір хадисі терең ойландырады. Ол: «Жындар мен адамдардың сенбейтіндерінен басқалар, жер мен көктегі барлық жаратылыс, менің Алланың елшісі екендігімді біледі». (Ахмед бин Ханбәл, Мүснәд)
Дайындаған – Тұрар ТҮГЕЛҰЛЫ
