Сұрақ: Пайғамбардың (с.ғ.с.) есімін кім қойды?
Жауап: Анамыз Әмина босануға санаулы күндер қалғанда ұйықтап жатқан шағында: «Сен адамдардың ең қайырлысына және мына үмбеттің иесіне жүктісің. Оны босанған уақытта: «Бүкіл қызғаныштан сақтаушы Аллаға сыйынамын», – деп айтып, есімін «Ахмед» немесе «Мұхаммед» қой», – деп аян келген (Ибн Касир, әл-Бидая уән-Нихая).
Әмина анамыз босанған соң көрген түсін қайын атасы Әбдімүтәліпке айтады. Арада жеті күн өткенде атасы пайғамбарды (оған Алланың салауаты мен сәлемі болсын) Қағбаға алып барады. Жаратушыға шүкірлік етіп, бірнеше жерге құрбан шалады.
Астан соң құрайыштың атқамінерлері:
– Уа, Әбдімүтәліп! Осы асқа себепкер болған немереңнің есімін кім деп қойдың? – деп сұрайды.
– Мұхаммед.
– Аталарыңның бірінің есімін қойсаң болмас па еді?
– Мен көкте Тәңір, жерде халық оған мақтау айтсын деп әдейі қойдым, – деп жауап береді.
Расында «Мұхаммед» деген сөз араб тілінен аударғанда «мақтаулы», «мақтау айтылған» деген мағыналарды білдіреді.
Жалғас САДУАХАСҰЛЫ
