Бір күні атақты Хазіреті Әбу Дәрда қаланы аралап жүргенде бір топ адамның күнәһар бір адамға ауыр сөздер айтып, қорлап жатқанын көреді. Сосын олардан:
– Сендер бір адамның құдыққа түсіп кеткенін көрсеңдер, оны ол жерден шығарасыңдар ма? – деп сұрады. Олар бірауыздан:
– Әрине, шығарамыз! – деп жауап берді. Сонда Хазірет Әбу Дәрда:
– Олай болса, бауырларыңа ауыр сөз айтпаңыздар. Одан да сендерді күнәдан сақтаған Аллаға мадақ, мақтау айтыңдар! – деді. Сол уақытта жиналған адамдар:
– Сонда сіз мына күнәһарға ашуланбайсыз ба? – деп сұрады.
Алла Елшісі Мұхаммедтің (с.ғ.с.) тәрбиесімен рухани жетілген қадірлі сахаба былай деп жауап қайтарған екен:
– Мен оған немесе оның тұлғасына ашуланбаймын, мен тек оның жасаған күнәларына ғана ашуланамын. Күнәсін тәрк еткен кезде ол менің дін бауырым болып қала бермек.
Дайындаған – Тұрар ТҮГЕЛҰЛЫ
