Сұрақ: Тәһәжжүд намазын түннің қай уақытында оқыған дұрыс?
Жауап: Құптан намазынан кейін бір ұйықтап тұрып, түн жарымында оқитын намазды тәһәжжүд намазы деп атайды. «Тәһәжжуд» сөзінің өзі де ұйқыдан кейін ояну дегенді білдіреді.
Алла елшісі (с.а.с.) тәһәжжүд намазы жайлы: «Парыз намаздардан кейінгі ең абзал намаз – түнгі намаз» деген (Муслим). Тағы бір хадисінде «Түнгі намазды оқыңдар, ол сендерден бұрынғы ізгі, салиқалы құлдардың әдетке айналдырған намазы. Шындығында, түнгі намаз Аллаға жақындата түседі, күнәлардан арылтады, ауру-сырқаттардың шипасын беріп, жамандықтан алшақтатады» деген (Тирмизи).
Құранда тәһәжжүд намазына тұрғандар туралы: «Олардың жамбасы төсектен ажырап (түннің бір уағында ұйқыдан тұрып) Раббыларына жалбарынады» деп айтылған (Сәжде сүресі, 16-аят).
Пайғамбарымыз (с.а.с.) таһажжүд намазын үнемі оқитын. Кейбір риуаяттарда құптан намазын оқығаннан кейін үтір намазын оқымай ұйқыға жататын. Түннің бір уағында тұрып, таһажжүд намазын оқып, одан кейін үтір намазын оқығандығы айтылады (Муслим).
Яғни, түнде бір мезгіл ұйықтағаннан кейін тұрып екі, төрт немесе сегіз рәкатқа дейін намаз оқыса, бұл намаз таһажжүд намазы болып саналады. Жалпы тәһәжжүд намазының уақыты құптан намазынан кейін басталып, таң намазына дейін жалғасады. Яғни осы аралықта ұйқыдан тұрып оқуға болады.
Пайғамбарымыз (с.а.с.) түннің соңғы бөлігінде жасалған дұғалардың қабыл болатынын айтқан. «Пенденің Раббысына ең жақын болатын кезі – түннің соңғы бөлігі. Егер сол сағатта Алланы зікір етушілерден бола алсаң, бол» деген (Тирмизи).
«Раббымыз тәбәракә уә тағала әрбір түннің соңғы үштен бір бөлігінде аспан дүниесіне түседі де: «Маған дұға қылып жатқан кім бар екен, жауап берейін. Менен сұрап жатқан кім бар екен, сұрағанын берейін. Менен күнәсін кешіруді тілеп жатқан кім бар екен, кешірейін» дейді» деген (Бухари).
Сондықтан осы хадистерге сүйене отырып, түннің соңғы бөлігінде оқуды абзал деп санауға да болады.
Алау Әділбаев
Жақсы жазылған екен.
Ассаламағалейкум, таһажжүд намазын екі рақат оқығанда үтір намазын бір рет оқу қажет пе?
Үтір намазын ережесімен оқимыз.Ассалямулейкум уа рахматуллахи уа баракатух!
Тахаджут осы Аида сағат нешеде окимыз