Иә, Имам Әшғари «әйел затынан да пайғамбар келеді» деген көзқарасты ұстанды. Ол әйел затынан пайғамбар келуі мүмкін деген пікіріне Құран-Кәрімнен мынандай дәлелдерді келтірді: «Біз Мұсаның анасына уахи еттік» (Таһа, 20/38). «Мұсаның анасына: «Оны еміз де оған бір нәрсе болады деп қорықсаң, онда оны дарияға салып жібер. Қорықпа да, күйінбе! Расында, оны саған қайтарамыз да оны пайғамбарлардан қыламыз» деп уахи еттік» (Қасас, 28/7). Имам Әшғаридің пікірінше, бұл аяттар әйел затына Алладан уахидің түскенін білдіреді. Ал, уахидің келуі – пайғамбарлықтың белгілерінің бірі. Имам Әшғари осы пікірінің негізінде Мәриям, Асия, Сара, Хажар, Хабба және Мұсаның анасын пайғамбар болуы ықтимал деп пайымдады. Сонымен бірге, имам Әшғаридің пікірінше, әйел адам муфти, әкім және дін уағызшысы бола алады. Себебі, «әмр бил-мағруф уа нахи анил-мүнкар (жақсылыққа бастау, жаманшылықтан қашыру)» – олардың да парызы.
Ал, Имам Матуридидің көзқарасынша, пайғамбар тек ер тегінен жаратылады. Ол бұл пікіріне Құран Кәрімнен мынандай дәлел келтірді: «(Мұхаммед с.а.у) сенен бұрында өздеріне уахи етіп, еркектерді ғана жібердік. Егер, білмесеңдер кітап иелерінен сұраңдар» (Нахыл, 16/43), «Сенен бұрын да кенттердің халқынан өздеріне уахи етіп, еркектерді ғана жібердік» (Жүсіп, 12/109), «Сенен бұрын да өздеріне уахи етіп, еркектерді ғана жіберген едік» (Әнбия, 21/7). Имам Матуриди осы үш аятты негізге ала отырып, пайғамбарлар тек қана еркек нәсілінен келеді деп білді. Сондай-ақ, оның пікірінше, әйел затынан халиф, әкім, әмірші, қолбасы, қазының болғаны дұрыс емес. Себебі, әйелдің затының нәзіктігі бұл міндетті көтере алмайды. Бірақ, әйел адам муфти болуы мүмкін деді.
Имам Матуриди «әйел затынан пайғамбар келеді» деген пікірмен келіскен емес. Ол: «Мұсаның анасына аят түсірдік» деген уахи сол кездегі көзі тірі Шұғайып (ғ.с) пайғамбарға жіберіліп, ол уахиді Мұсаның (ғ.с) анасына жетікізуі тиіс болды» деп түсіндірді. Сондай-ақ, бұл аятты хз. Мәриям анамызға түскен илаһи хабар секілді деп ұғатынын жеткізді. Оған Құран Кәрімдегі: «Сонда олардың бер жағынан шымылдық ұстап қойған еді. Сондай-ақ, оған рухымызды (Жәбірейілді) жібердік те ол, оған толық адам бейнесінде көрінді» (Мәриям, 19/17) деген аятты дәлел ретінде көрсетті. Яғни, «жаңа бір пайғамбарды өмірге әкелу үшін оның анасына періште жіберген секілді, Мұсаның (ғ.с) анасына бір періште жіберген болуы мүмкін» деп білді.
