Сұрақ: Дипломым болса да таксист болып жұмыс жасаймын. Таңертең үйден шыққан уақытта қарт әкем үнемі Аллаға тәуекел етіп шық деп айтады. Бұл қаншалықты дұрыс?
Жауап: Жалпы мұсылман адам үнемі Аллаға тәуекел еткені дұрыс. Адамдардың басым бөлігі басқа қатер төнгенде немесе аса маңызды іске кірісер алдында ғана Алланы еске алып, Соған тәуекел қылады. Алла жүрегімен тәуекел қылған адамды Өзінің кепілдемесіне алады. Бұл кепілдеменің сенімділігі сонша, адамның қолына ұстап тұрған затынан да сенімдірек. Алла ол пендеге ризықтың есігін оның қиялына кірмеген жақтан ашып қоюға құдіретті.
Бұл жайында Құран: «(Мұхаммед (с.ғ.с.): Бізге Алланың жазғаны ғана болады. Ол біздің иеміз. Мүміндер Аллаға тәуекел қылсын де», – деп хабар береді (Тәубе: 51).
Алла Өзіне тәуекел қылушыларды сүйеді. Бірақ, жай ғана тәуекел емес, бәлкім тәуекел етерден бұрын адам белгілі себептер іздеп, сосын барып тәуекел қылғаны жөн: «Ал кім Аллаға тәуекел қылса, сонда Ол оған жетіп асады…» (Талақ: 2-3).
Басқаша айтқанда, тәуекел етуші адам қандайда бір кәсіп иесі болса, онда өзінің тұтынушыларының [клиенттерінің] санын арттыру үшін қажетті шарттарды орындайды. Мысалы, сервис сапасын көтереді, қызмет орнын жақсартады немесе көліктің ішін таза ұстайды, шылым шекпейді, таза һәм ұқыпты киінеді, артық сөйлемейді және т.б. Сосын барып Аллаға тәуекел етеді деген сөз.
Жалғас САДУАХАСҰЛЫ
