Сұрақ: Адамдардың бір-біріне мейірімсіз болу себебі неде?
Жауап: Исламның басты талаптарының бірі – мейірімділік пен татулықта өмір сүру. Мейірімділік – адамның бойында болуға тиіс жақсы қасиеттердің бірі. Адамда мейірімділік қасиеті болмаса, отбасында, қоғамда тұрақтылық жоғалады. Қоғамда мейірімділік таразысы жоғалса, адамгершілік қасиеттерден арылып, ел рухани күйзеліске ұшырайды. Бір-біріне деген кекшілдіктің саны артып, түрлі оқыс салдарға соқтырады.
Ал, адамдардың бір-біріне мейірімсіз болуының бірнеше себебін атауға болады. Мүмкін бала кезінде мейірім мен жылулықты көрмеуі, ішкі ренішпен ашуын айналасындағылардан алуы, кейбір түсініктегілер жұмсақ болуға болмайды деп, өзгеге суық мінез көрсетуі, өзін әлсіз сезінген адам өзгелерді төмендету арқылы өзін мықты сезінуі, басқа адамның сезімін түсінбейтіндер, дөрекілікті қалыпты нәрсе ретінде қабылдайтындар, шаршау мен өмірлік қиындыққа түскендер т.б.
Пайғамбарымыз (с.а.у.) хадисінде: «Рақым көрсетпегенге, рақым көрсетілмейді», десе, тағы бір хадисінде: «Кімде-кім бір мүмінннің дүниедегі қиындықтарының бірін шешетін болса, Алла Тағала да Қиямет күнінде ол мүміннің қиындықтарының бірін шешеді (жеңілдетеді). Кімде-кім қиналғанға жеңілдік көрсететін болса, Алла Тағала да оған дүниеде және ақыретте жеңілдік көрсетеді. Кімде-кім бір мұсылманның айып-кемшілігін жасыратын болса, Алла Тағала да оның дүниедегі және ақыреттегі айып-кемшілігін жасырады», деген.
Икрам АЙТАЕВ
