Сұрақ: Жеті атаға дейін қыз алмау Исламға қайшы ма?
Жауап: Салт-дәстүр – ғасырлық тәжірибеден өтіп халықтың рухани өмірінен орын тапқан құндылық. Қазақ халқының да өзіндік қалыптасқан салт-дәстүрі мен әдет-ғұрыптары бар. Олар ғасырлар бойы Ислам дінімен сабақтасып қоғамда өз орнын тапқан.
Кейбір асыра діншілдер дін мен дәстүрді салыстырып, дәстүрге деген жағымсыз көзқарастарын білдіріп отырады. Атап айтқанда, жеті атаға дейін қыз алмау қағидасы дінде жоқ, жеті атаға дейін қарамай қыз ала берсең болады деген сынды көзқарастарымен діни фундаменталистік ұстанымдарын аңғартуда. Мұндай көзқарастағылар ата дәстүрінен безіп, ислам шариғатымен өмір сүреміз дейтін, асыра діншілдер санаты. Олар дінараздық алауыздыққа бейім болады.
Жеті атаға дейін қыз алмау хикметі – қан тазалығы мен ұрпақ саулығы және руаралық татулық. Пәтуа мәселесінде ханафи мәзһабының қағидасында дәстүрге жүгіну бар. Салт-дәстүр Ислам дініне қайшы келмесе орындала береді. Бұл Ислам қағидаларында бар дүние. Демек, саналы адамның дін мен дәстүрді сабақтастыра алуы – дәстүрлі Исламды берік ұстануы екен.
Икрам АЙТАЕВ
