Сұрақ: Ислам мен дәстүрде үйлесімділік бар ма?
Жауап: Ислам діні мен қазақ дәстүрлері арасында ғасырлар бойы орныққан ашық үйлесімділік бар. Ол үйлесімділік іргесін кешегі атеистік қоғам – Кеңес одағы да ыдырата алған жоқ.
Жаһандану үдерісі белең алған бүгінгі дәуірде, өкінішке орай, сол табиғи үйлесімділікке сына қағып, шабуыл жасау фактілері кездесіп отыр. Ғасырлар бойы халықтың өзімен бір жасасып келген, тұрмысына, санасына, болмысына сіңіп, рухымен тұтасып кеткен дәстүрлі дінді қол жетпес күрделі дүниеге ұқсатып, Құран мен хадистің мазмұнын бұрмалап түсіндіріп, халықтан қасақана алыстату үдерісі әлеуметтік желілерде байқалады. Қазақты исламға жаңа кірген ел секілді көрсетіп, жылдар бойы қалыптасқан дәстүрді, ғұламалар жүрген жолды адасушылық деп, қазақ руханиятының күре тамырын қырқуға бағытталған арандатушы әрекеттер де бар.
Қазақ әдет-ғұрып, салт-дәстүрлерін ешбір шариғи негізсіз исламға қарсы қойып, күпірліктің, Аллаға серік қосудың көрінісі ретінде айыптау надандықтың белгісі. Ал бұл өз кезегінде дәстүрлі құндылықтармен бірге ішкі тұрақтылықтың әлсіреуіне алып келеді. Сондықтан ұлтты қалыптастырған құндылықтарды қорғау – елдің ішкі тұрақтылығы мен мемлекет іргесінің бүтіндігін қорғау саналады.
Икрам АЙТАЕВ
