Сұрақ: Ислам дінінің негіздері қандай?
Жауап: Ислам дінінің ақида, фиқһ, ахлақ деген негіздері бар. Мұсылманның күнделікті діни рәсімдері мен жоралғылары аталған ілімдерден бастау алады. Олар ханафи мәзһабы мен матуриди сенім мектептеріне сүйенеді.
Ақида ілімі (сенім) – Алланың бар және бір екендігіне сену, періштелерге сену, қасиетті кітаптарға сену, пайғамбарларға сену, ақырет күніне сену, тағдырға сену, жақсылық та, жамандық та бір Алладан екендігіне сену, өлгеннен кейін қайта тірілуге кәміл сеніп, бар ықыласымен илану.
Шариғат ілімі – Ислам дінінің (бес парыздары) құқықтық, қағидалық, дәстүрлі, рухани-этикалық және діни нормаларының жиынтығы. Ол мұсылман адамның өміріндегі құлшылық ету, сауда-саттық қатынастары, халал мен харам мәселесі, неке қию, кәсіп ету және басқа да көптеген салаларды қамтиды.
Ахлақ ілімі – Құран Кәрімнің, Мұхаммед (с.а.у.) пайғамбардың сүннетіне, Ислам құқығының тәжірибесіне негізделген этикалық нормалар мен ережелер. Басқаша айтқанда, мұсылман адамның ізгі болмысы.
Аталған ілімнің қайнар көздері ҚМДБ-ның ресми дереккөздерінде қамтылған.
Икрам АЙТАЕВ
