Қоғамдағы діни ахуалға байланысты оқырманнан «Жалған рухани ұстаздар кімдер және олардан қалай сақтанамыз?» деген сауал жолданды. Бұл тақырыпта Қызылорда облысы дін істері басқармасы «Дін мәселелерін зерттеу орталығының» аға маманы, теолог Едіге Жұмахметовтің пікірін сұраған едік.
– Жалған рухани ұстаздар өздерін әулие, емші ретінде таныстырып, қоғамда көрініп жүр. Олар діннің атын жамылып, өздерінің жеке пайдасын басты орынға қояды. Көп жағдайда олар дәстүрлі діни білімге сүйенбейді. Бірақ өз бағытына қарай бұрмалап алады.
Теологиялық тұрғыдан қарағанда, шынайы рухани ұстаздың басты ерекшелігі, адамды дәстүрге, дінге сүйемелдеп, жақындатады. Ал жалған ұстаздар керісінше, өзіне тәуелді қылады, өз билігін үстем етіп көрсетеді. Өзінің материалдық жағдайын жақсартуға ұмтылады. Олар өздерін ерекше санайды. Ешқашан қателеспейтін күнәсіз адам ретінде көрсетеді. Өзіне сын айтуға жол бермейді. Олардың жеке білімі жүйесіз болып келеді. Адам дін үйренгенде танылған ғалымдардан оқып, зерттеп үйрену керек. Сонда жалған ұстаздардан сақтана алады.
Қоғамда діни ағартушылықты күшейтуіміз керек. Білген, оқыған, үйренген адам көп қауіптен сақтануға мүмкіндік алады. Мешіт имамдары ғана емес, арнайы білім алған теологтар, дінтанушылар да бар. Мектеп бағдарламасында да оқытады. Осындай сабақтарға, діни ағартуға баса мән беріп, баланың санасында жалған ұстаздарға қарсы иммунитет қалыптастыру керек, – деді Едіге Ерзахметұлы.
Дәулет Қырдан
