Сұрақ: Араб шейхтарының діни еңбектерін пайдалануға бола ма?
Жауап: Қазіргі таңда елу жетіге жуық мұсылман елі бар. Олардың жиырма екісі – араб елдері. Әр елдің өз салт-дәстүрі мен әдет-ғұрпы негізінде муфтияттары діни сұрақтарға жауап беріп отырады. Сондықтан діни пәтуа үшін шетелдік шейхтардың ұсынған діни ақпараттарын алуға, оларға еліктеуге негіз жоқ.
Елімізде зерттеу жұмыстарымен айланысатын дін саласындағы исламтанушы ғалымдар тіл, тарих бағыты мен Құран аяттары, хадистердің түсіндірмелерін т.б. мақсаттарда пайдаланады. Ал, шетелдік шейхтардың түрлі діни ұстанымдары негізіндегі ислам құқықтары мен сенім (ақида) мәселелерінде айырмашылықтарын ескере, діни еңбектері мен уағыздарын тыңдауға ұсынылмайды.
Себебі олардың кейбір сөздері зайырлылық құндылықтарын жоюға, салт-дәстүр мен әдет-ғұрыптарды жоққа шығаруға, басқа дін өкілдеріне деген жағымсыз көзқаратарға бағытталған болуы мүмкін. Осыған орай, біздің елде ресми танылған ханафи мәзһабы мен матуриди сенімі негіздеріне сай келетін діни еңбектері мен исламтанушы ғалымдардың діни ақпараттары қолжетімді. Адасушылыққа бой алдырмаймын десең, отандық дін ғалымдарының ұсынған діни ақпараттарына сүйенгеніміз абзал.
Икрам АЙТАЕВ
