Астана қаласында Әлемдік және дәстүрлі діндер лидерлері съезіне дайындық мәселелері талқыланды.
Жиын Конфессияаралық және дінаралық диалогтың халықаралық орталығы жанындағы Бірлескен тұрақты комитеттің екінші отырысына дайындық аясында өтті. Бұл комитет – съез шешімдерінің жүзеге асуын қадағалайтын және дінаралық өзара түсіністік пен ынтымақтастықты нығайтуға бағытталған жобаларды үйлестіретін тұрақты орган.
Алқалы басқосуға Қазақстан мұсылмандары діни басқармасының Төрағасы, Бас мүфти Наурызбай қажы Тағанұлы, ҚР Мәдениет және ақпарат министрлігі Дін істері комитеті төрағасының орынбасары Мақсат Раманқұлов, Конфессияаралық және дінаралық диалогтың халықаралық орталығы Басқарма төрағасының орынбасары Бауыржан Бәкіров, сондай-ақ ҚМДБ Төрағасының орынбасары, наиб мүфти Кенжетай Байкемелұлы қатысты.
Басқосуда алдағы съездің мазмұндық бағыты мен күн тәртібіне енгізілетін негізгі тақырыптар жан-жақты қаралды. Сонымен қатар, дінаралық өзара түсіністік пен ынтымақтастықты арттыруға бағытталған бірлескен жобаларды жүзеге асыру жолдары сөз болды.
Бас мүфти Наурызбай қажы Тағанұлы дінаралық келісім мен қоғамдық тұрақтылықты қамтамасыз етудегі мұндай жұмыстардың маңыздылығына тоқталып, Бірлескен тұрақты комитет аясындағы жобалардың қоғамға игі нәтиже беретінін атап өтті.
