Адамның жасаған жақсылығы жеті ұрпағына дейін тиеді және жеті ұрпағына сауап болып жетеді, иншалла.
Құранда Қызыр (а.с.) мен Мұса (а.с.) пайғамбардың екі жетім баланың үйлерінің қабырғасын қайта көтеріп қойғаны жайлы оқиғаны еске алсақ болады.
Құранды әлгі балалардың аттары айтылмайды, тек екі жетім бала ғана делінеді.
Алла Тағала осы екі жетім балаға ең абзал болған екі жанды, Құранда 134 мәрте аты айтылған Мұса (а.с.) пайғамбар мен хадисте аты айтылған, ізгі пендесі Қызырды (а.с.) жіберіп,қызметін жасатып қояды.
Неліктен десе, Құранда «Каһф» сүресінің 82-аятында: «уа каанаа әбууһумәә соолихаа», яғни «олардың ата-анасы ізгі адамдар болған» деп айтқан. Ғалымдар зерттеу жүргізіп, осы екі жетім баланың жетінші атасы ізгі, салих жан болған екенін анықтайды.
Міне осыдан түйетініміз, пенденің ізгі адам болуының шарапаты жеті ұрпағына дейін тиеді екен.
Сондықтан бәрі нәрсе ниетке байланысты болады. Әрдайым қандай да бір жақсы амал жасаған адамды көрсеңіз, солар сияқты болуды тілеп, сондай болуға тырысыңыз.
Алла баршамызды жеті ұрпағына дейін жақсылығы тиетін пенделерінен болуға жазсын!
(Шейх Рахметолла Термизи)
Дайындаған Қуат ҚАБДОЛДА
