Тәуелсіздік алған жылдардан бері қазақ қоғамына бұрын түр-түсін көріп-білмеген талай жат ағым қаптап еніп кетті. «Жәннатқа барудың жолын көрсетемін» деген желеумен қаншама жанның миын улап, жат идеологияның құрбанына айналдырды. Оның соңы қандай оқиғалармен аяқталғанын бәріміз білеміз. Сондай қатерлі ағымның бірі – такфиризм.
Такфиризм – дәстүрлі исламның асыл құндылықтарына қайшы келетін, қоғамның ынтымағы мен бірлігін бұзуға бағытталған радикалды идеология. Бұл ағым – діни экстремизмге бастайтын ең қатерлі соқпақтың бірі.
Такфиршілердің басты ерекшелігі – өз сенімін ұстанбайтын мұсылманды «кәпір» деп жариялап, оған қарсы әрекетті «жиһад» деп бұрмалап түсіндіруінде. Олар ата-бабамыздан жеткен асыл дәстүрді мойындамай, мәзһаб ұстанушыларды адасқан деп айыптайды. Құран сүрелерін қабір басында оқу, марқұмға құран бағыштау, Пайғамбар мәулітін атап өту секілді ізгі амалдарды «дінге енгізілген жаңалық» деп теріске шығарады. Мұндай көзқарас – іштей алауыздық тудырып, халықтың рухани бірлігін шайқалтудың ең төте жолы.
Такфиризмнің ең қауіпті тұсы – адамның ең жақын туыстарының арасына сына қағып, оларды бір-біріне жат қылып, жауластыруында. Бұл идеологияға ергендер тіпті ата-анасын да «дінсіз» деп атаудан тайынбайды. Соның салдарынан отбасының берекесі кетіп, ұрпақ ұлттық тамырынан ажырап қалады.
Бұл – діни сауатсыздықтың, рухани адасудың анық көрінісі. Онымен күресу тек дін мамандарының ғана емес, тұтас қоғам мен мемлекеттің ортақ міндеті. Өйткені жат ағымдар – елдің ертеңі болатын жастардың санасын улап, оларды өз ұлтына, дәстүріне, Отанына қарсы қояды.
Жастарға дұрыс діни білім беріп, салт-дәстүрімізбен суарылған тәлім-тәрбие ұсыну – ең басты міндеттің бірі. Тарихын құрметтеген, тағылымын ұмытпаған ел ғана баянды болашаққа қадам баса алады.
Жасұлан БАҚЫТБЕК
