Сұрақ: Әке балаға нені үйретуі керек?
Жауап: Исламда жақсы із қалдыру – сауапты амалдардың бірі. Адам өмірден өткеннен кейін де артынша ізгі амалдарының, жақсы істерінің сауабы жалғасып тұрады. Ата-ана перзенттерінің рухани тәрбиесіне жауапты. Бұл жайында Құран мен хадистерде баяндалған.
Ата-ана баласына иман мен ислам негіздерін үйретуге, қоғамда өз орнын табуына, адал мен арамды ажыратып беруге, жақсы мінез-құлыққа баулуға, өзі жақсы мінезімен, адалдығымен үлгі болуға, балаға мейірімділік танытуға мінетті.
Егер баласының тәрбиесіне салғырт қарап, иман, намаз, адалдық сияқты негізгі нәрселерді үйретпесе, онда ол күнәлі және сол үшін жауапты болады. Бала жаман жолға түссе, ол әкенің емес, баланың жауапкершілігі болады. Дегенмен баланың дұрыс болуына Алладан дұға тілеу кемдік етпейді.
«Нәжм» сүресінің 39-аятында: «Әр адам өз еңбегінің ғана қарымын алады» десе, Пайғамбарымыз (с.а.у.) хадисінде: «Сендердің әрбірің – бақташысыңдар (жауаптысыңдар). Әке-өз отбасының бақташысы әрі сол үшін жауапты…» деп, бала тәрбиесіне аса мән беру керектігін ескерткен.
Икрам АЙТАЕВ
