Сұрақ: Нәпіл оразаларды қай кезде ұстау керек?
Жауап: Оразаның талабы – адам ниет етіп екінші шапақтан (таң намазынан) бастап, күн батқанға (ақшам намазына) дейін ішіп-жеуден, нәпсі қалауларынан тыйылу. Оразалардың парыз, уәжіп, нәпіл деген түрлері бар. Олар Құран аяттары мен хадистерде баяндалған.
Парыз ораза Рамазан айында ұсталады. Рамазан айында түрлі себептермен қаза болған оразалар басқа күндері орындалады.
Уәжіп (атау) ораза – белгілі бір күні тұтамын деп атаған ораза түрі.
Нәпіл оразаларды Рамазан айынан басқа күндері күн ара, әр айда үш күн, әр аптаның дүйсенбі, бейсенбі күндері, Шәууәл айының алты күні, арапа күні және айт күндерінен басқа күндері ұстауға болады.
Оразаның қай түрі болсын, ниеті Алланың ризашылығы үшін болуы керек. Пайғамбармыз (с.а.у.) хадисінде: «Кім Алла үшін бір күн ораза тұтса, Алла Тағала оның жүзін тозақтан жетпіс күз алыстатады» деген.
Алла ниетіңізді қабыл етсін!
Икрам АЙТАЕВ
