Сұрақ: Ауыз бекітудің мәні неде?
Жауап: Рамазан айының қасиеттері мен хикметтері мол. Бұл ай арқылы Алланың ризашылығына бөленуге мүмкіндіктер көп.
Ораза шариғат термининде «арнайы ниет ете отырып, таңның атысынан, кештің батысына дейін ішіп-жеуден, нәпсі қалауларынан тыйылу» деген мағынада. Рамазан оразасы һижраның екінші жылы парыз етілді. Ораза Алланың ризашылығы үшін болу керек. Сонда ғана дінде айтылған сауапқа лайық болады.
Ауыз бекіту – басқа парыз амалдарынан ерекше құлшылық түрі. Оның ерекшелігі – түнде ешкім көрмейтін уақытта сәресіге тұрады. Күндіз барлығы бірдей жүре береді. Ауызашар уақыты кіргенде де, ешкімсіз жалғыз өзі қаласа да, адам Алла көріп тұрғанын сезінеді, аузын ашып жібермейді. Мұның барлығы Алла үшін ораза ұстағандығының белгісі.
Пайғамбарымыз (с.а.у.) хадисінде: «Адам баласының барлық (ізгі) амалы (сауабы) көбейтіп беріледі. Бір жақсылыққа он мысқалдан жүз мысқалға дейін. Алла азза уа жаллә: «Ораза Мен үшін. Оның қарымын тек Мен беремін. Өйткені, ол тек Менің разылығым үшін шаһуаттан және ішіп жеуден бас тартты», деген.
Демек, Алла үшін жасалған ғибадаттың қарымын Алла Өзі қайтаруға уәде беріп тұр. Мұндай сәттерді жіберіп алмайық.
Икрам АЙТАЕВ
