Сұрақ: Исламда балағат сөз жайында не айтылған?
Жауап: Балағат сөз айту – Исламда құпталмаған іс. Әдетте адамдар ашуға ерік беріп орынды, орынсыз балғат сөздерді жиі қолданып күнәға барады.
Қазақ дәстүрінде сөздің құдіретін ескеріп, «Ойнап сөйлесең де, ойлап сөйле» деп, орнымен сөйлеуге тәрбиелеп отырған. Орынсыз балағат сөздердің нәтижесінде ренішке, өкінішке бой алдырады.
Дәстүрлі Ислам орынды сөзді қолдану қайырлы іс екенін ескерткен. Ақылдылық, парасаттылық мұсылманның бойынан табылатын қасиет болуға тиіс. Пайғамбарымыз (с.а.у.) хадисінде: «Аллаға иман еткен кісі – міншіл емес, қарғап-сілеуші емес, жаман жүрісті емес, былапыт, балағат сөзді емес», – деп, жағымсыз қылықтардан аулақ болуға шақырады.
Имам Бұхариден келген бір хадисте: «Расында, үлкен (күнәлардың) ең үлкенінің бірі – кісінің өз ата-анасын лағынеттеуі», деді. (Адамдар): «О, Алланың елшісі, кісі өз ата-анасын қалайша лағынеттейді?» деп (сұрағанда, ол): «Бір кісі бір кісінің әкесін балағаттаса, ол мұның әкесін балағаттайды, анасын балағаттаса, мұның анасын балағаттайды» деген.
Сөзі мен амалы жарасқан игі тәрбиелі ұрпағымыз көп болсын!
Икрам АЙТАЕВ
