15 сәуірде Достық үйінің мәжіліс залында Қызылорда облысының дін істері басқармасының ұйымдастыруымен дін мәселелері жөніндегі республикалық ақпараттық-түсіндірме тобының мүшесі, Қазақстан Республикасы Мәдениет және ақпарат министрлігінің Дін істері комитеті Интернет кеңістікте діни экстремизмнің алдын алуды үйлестіру басқармасының басшысы Ж.Долиевтің қатысуымен өңірлік ақпараттық-түсіндіру тобы мүшелеріне арналған «Рухани қауіпсіздік» тақырыбында семинар ұйымдастырылды.
Семинарға басқарма басшысы М. Қазбекова, басқарма қызметкерлері, Дін мәселелерін зерттеу орталығының теолог, психолог мамандары, Қазақстан мұсылмандары діни басқармасының діни қызметкерлері, жергілікті атқарушы органдардың өкілдері қатысып, АТТ мүшелері қоғамдағы дін тұрақтылықты сақтаудың тиімді жолдарымен бөлісті. Ж.Долиев халық арасында діни экстремизм мен терроризмнің алдын алу бағытында ақпараттық-түсіндіру жұмыстарын жүзеге асырудың жаңа тәсілдері мен форматтарын ұсынды.
Айта кету керек, РАТТ мүшесі Ж.Долиев ү.ж. 14-16 сәуір аралығында облыстық дін істері басқармасының «Облысқа республикалық ақпараттық түсіндірме топ мүшелерін немесе теолог, дінтанушы және басқа да діни салаға қажетті мамандарды шақыру, іс-шаралар өткізу» әлеуметтік жобасы аясында Қызылорда облысына арнайы шақыртылған болатын.
Шақырылым барысында РАТТ мүшесі И.Әбдікәрімов атындағы Қызылорда аграрлық техникалық жоғары колледжінің студенттерімен, Сырдария және Жалағаш аудандарында ауыл жастарымен, NEET санатындағы жастармен, пробациялық бақылаудағы азаматтармен, білім беру ұйымдарының қызметкерлерімен, орта мектептердегі психолог мамандармен, «Зайырлылық және дінтану негіздері» пәні мұғалімдерімен, қоғамдық кеңес мүшелерімен, ардагерлер кеңесі өкілдерімен кездесті.
Іссапар барысында РАТТ мүшесі Ж.Долиевтің қатысуымен арнайы бейнетүсірілім жүргізілді, сонымен қатар қылмыстық-атқару жүйесі департаментінің № 60 мекемесінде экстремизм және терроризм баптарымен сотталған жазасын өтеушілермен топтық және жеке кездесулер ұйымдастырылды.
Одан бөлек, РАТТ мүшесі Шиелі аудандық «Руханият орталығында» жастармен, пробациялық бағылаудағы азаматтармен, білім беру, мәдениет саласы қызметкерлерімен, аудан тұрғындарымен, №149 орта мектепте, №47 мектеп-лицейінде жоғары сынып оқушыларымен, Шиелі индустриалды-аграрлық колледжінде студент жастармен кездесулер өткізіліп, аудан тұрғындарының дін мәселелері бойынша көкейтесті сұрақтарына жауап берді.
Балауса СЫЗДЫҚОВА,
Қызылорда облысы
«Дін мәселелерін зерттеу орталығы»
КММ-нің журналист маманы
