Сұрақ: Дінімізде ауызбіршілік туралы не айтылған?
Жауап: Ауызбіршілігі жоқ елдердің болашағы да жоқ. Ұлтараздық пен дінараздық бүліктің емі – ауызбіршілікте. Дәстүрлі діндердің мақсаты да – ауызбіршілік пен ізгілік.
Ислам қоғамда тыныштық пен бірлік, әділдік болуын көздейді. Радикалды діни топтар зайырлылықты дінге жат деп, түрлі діни уағыздарымен қоғамның бірлігіне сызат түсіруде. Діни ағымдардың мақсаты болса, елдің ауызбіршілігін құртып, алауыздық қоздыру. Қиянатшылдықтың, опасыздықтың, бүлікшілдіктің ұлты мен діні болмайды.
«Мәида» сүресінің 2-аятында: «…Жақсылықта, тақуалықта бір-бірлеріңе жәрдемдесіңдер. Күнәға және дұшпандық істерге жәрдемдеспеңдер. Алладан қорқыңдар! Күдіксіз Алланың азабы қатты» десе, Пайғамбарымыз (с.а.у.) хадисінде: «Егер көршің өзге дін өкілдерінен болса, онда сенің мойныңда бір ақысы бар. Ол-сенің көршің болғаны үшін. Егер көршің мұсылман болса, екі міндетің бар. Бірінші көршің, екінші мұсылман болғаны үшін. Ал егер көршің мұсылман туысқаның болса, үш міндетің бар. Көршің, мұсылман әрі туысқаның болғаны үшін», деген.
Еліміздің ауызбіршілігін құртатын ұлтараздық және дінарздық алауыздықтан сақтанып, елдің тұрақтылығын сақтау баршаға міндет.
Икрам АЙТАЕВ
