Дін саласындағы мемлекеттік саясатты жүзеге асыру бағытында республикалық ақпараттық-түсіндіру тобының мүшесі, теолог, исламтанушы, Нұр-Мүбарак Египет Ислам мәдениеті университетінің ғылыми қызметкері Ризабек Батталұлы Сыр өңіріне арнайы іссапармен келді.
Іссапар аясында белгілі теолог Қызылорда қаласында қылмыстық-атқару жүйесі департаментіне қарасты № 37 түзеу мекемесінде пробациялық бақылаудағы азаматтармен және «Coworking center»-де кәсіпкерлермен, «Gras coffee» кофейнясында спортшы жастармен, сондай-ақ, «Мырқы қажы» мешітінің жамағаттарымен кездесті. Онда зайырлылық қағидаттары, тұрғындардың діни-сенім бостандығы жайлы жан-жақты түсіндіріліп, діни мәселелерге қатысты сауалдарға жауап берді.
Одан әрі РАТТ мүшесі Ризабек Батталұлы «Дін мәселелерін зерттеу орталығында» ақпараттық-түсіндіру тобының мүшелерімен жүздесіп, деструктивті діни ағымды ұстанушыларды оңалтудағы тәжірибелерімен бөлісті. Сонымен қатар ол қылмыстық-атқару жүйесі департаментінің № 68 мекемесінде экстремизм және терроризм баптарымен сотталған жазасын өтеушілермен топтық және жеке кездесу өткізіп, олармен оңалту жұмыстарын жүргізді.
Сыр өңіріне арнайылап келген РАТТ мүшесі Сырдария ауданында NEET санатындағы жастармен, пробациялық бақылаудағы азаматтармен, қандастармен, аудандық төтенше жағдайлар бөлімінің ұжымымен, «Мұсылмандар» мешітінде дін қызметкерлерімен, мешіт жамағаттарымен, Шіркейлі ауылындағы «Нұрмұхамммед ахун» мешітінде, Н.Ілиясов ауылындағы «Айтбай» мешітінде, Шаған ауылындағы «Шаған» мешітінде мешіт жамағаттарымен ұлттық және діни құндылықтар, деструктивті діни ағымдардың алдын алу тақырыптарында тағылымды дәрістер оқыды.
Шиелі ауданында №127 Ш. Уәлиханов атындағы орта мектеп-лицейінде жоғары сынып оқушыларымен, «Хазіреті Мұхаммед с.а.у», «Шайзында» мешіттерінде, Иіркөл ауылындағы «Жақаев Ыбырай ата» мешітінде мешіт жамағатымен, дін қызметкерлерімен, аудандық медицина қызметкерлерімен, «Семизбай-U» ЖШС-да еңбек ұжымымен кездесу жалғасып, қоғамдағы діни тұрақтылықты сақтау жолдары, елді ауызбіршілік пен сабырға шақыру бағытында мазмұнды әңгімелер айтылды.
Белгілі исламтанушы Ризабек Батталұлының рухани насихаттары мен ой-толғаулары тыңдаушыларын ерекше ықыласқа бөлеп, рухани тәрбие мен дін тақырыбында пайдалы ақпараттармен бөлісу алаңына айналды.
Бұл сапар – қоғамдағы діни сауаттылықты арттыруға, рухани бірлікті нығайтуға, әсіресе жастар арасында теріс ағымдардың алдын алуға бағытталған игі қадамдардың бірі болды.
Балауса СЫЗДЫҚОВА,
Қызылорда облысы дін істері
басқармасы «Дін мәселелерін
зерттеу орталығы» КММ-нің
журналист маманы
