Қазақстан мұсылмандары діни басқармасының төрағасы, Бас мүфти Наурызбай қажы Тағанұлы Қызылорда облысына жасаған жұмыс сапары барысында бірқатар әлеуметтік және қайырымдылық шараларына қатысты.
Сапар аясында «Тайқазан» қайырымдылық жобасы бойынша облыстық Отбасын қолдау орталығы ұсынған тізім негізінде 100 мұқтаж отбасыға азық-түлік себеттері таратылды. Көмек алғандардың қатарында көпбалалы аналар, мүмкіндігі шектеулі жандар және ерекше бала тәрбиелеп отырған отбасылар бар.
Сондай-ақ, Бас мүфти «Өмірге үміт сыйла» акциясы аясында науқас балалардың ата-аналарымен кездесіп, балалардың ем-домына қажетті қаржылай сертификаттарды табыстады.
Айта кетейік, ҚМДБ «Зекет және қайырымдылық» қорының ұйытқы болуымен Сыр өңірінде әлеуметтік бағыттағы жобалар жүйелі түрде жүзеге асып келеді. Атап айтқанда, жыл басынан бері «Ел үлесі – пәтерге» жобасы арқылы 9 мұқтаж отбасы баспаналы болды. «Жылу сыйла» жобасы бойынша 9 үйге газ жүйесі жүргізіліп, тұрмысы төмен отбасыларға отын-көмір жеткізу жұмыстары басталды. «Өмірге үміт сыйла» жобасы аясында да науқас жандарға тұрақты түрде көмек көрсетілуде.
Сонымен қатар, Қызылорда қаласына қарасты Талсуат ауылындағы Арнаулы әлеуметтік қызметтер көрсету балалар орталығы мен Арал қаласындағы оңалту орталықтары жаңа оңалту құрылғыларымен қамтамасыз етілді. Мұнымен бірге аталмыш орталықтарға татами, айна, швед қабырғасы, бизиборд, доптар және түрлі дамытушы ойыншықтар тарту етілді.
