Жамбыл облысы Талас ауданына қарасты Аққұм ауылының «Тұңғатар» мешітінде Құранның жарты парасы мен Алланың 99 көркем есімін жатқа айту және әуезді азан жарысы өтті.
Жарысқа өңірдің түрлі мешіттерінен үміткерлер қатысып, өзара бақ сынады. Сайыс барысына ҚМДБ-ның Жамбыл облысы бойынша бас имамы Асқар Зәкіржанұлы арнайы келіп, қатысушыларға сәттілік тіледі. Сондай-ақ, «Һибатулла Тарази» қайырымдылық мекемесінің директоры Аманкелді Бірлік және Талас ауданының бас имамы Жалғасбай Жұбатқановпен бірге қазылар алқасында болып, жарысқа әділ бағасын берді.
Аядай ғана ауыл мешітінде өткен рухани кеште қасиетті Рамазан айының мол берекеті сезілді. Қатысушы шәкірттер бар білімдерін ортаға салып, қазылар алқасы мен көрермендерді тәнті етті. Жақсылықта жарысушылар қасиетті Құран аяттарын мәнерлеп оқып, жатқа айту шеберліктерін көрсетсе, тағы бір топ Алланың 99 көркем есімін жатқа айтып, әуезді дауыстарымен азан шақырып жатты.
Дәстүрлі мақам мен дұрыс дыбыстау ережелері қазылар тарапынан жоғары бағаланды. Іс-шара соңында жеңімпаздар мен белсенді қатысушыларға марапаттар табысталып, оларға бағалы сыйлықтар мен алғыс хаттар берілді. Құран сайысының басты жүлде иегеріне Ұмра қажылығына жолдама табысталды.
Ұйымдастырушылар мұндай рухани іс-шаралардың жастардың діни білімін арттыруға және ілімге деген сүйіспеншілігін оятуға зор ықпал ететінін атап өтті. Жамағат та бұл басқосудың ерекше әсер қалдырғанын айтып, осындай игі бастамалар жиі ұйымдастырылса деген тілектерін білдірді.
Сайыс қорытындысы бойынша орын алған қатысушылар төмендегідей:
Құран сайысы бойынша:
Бас жүлде – Рәтбек Ерасыл, Талас аудандық «Қаратау Қажы би» мешіті;
I орын – Дүйсенбі Аян, Тамды ауылы, «Тәңкібай ата» мешіті;
II орын – Лесбек Исмайыл Болатұлы, Талас аудандық «Қаратау Қажы би» мешіті;
III орын – Құрманбай Раян, Талас аудандық «Қаратау Қажы би» мешіті.
Әуезді азан сайысы бойынша:
I орын – Әбумұхаммед Әли, Бостандық ауылы «Төртбай ата» мешіті;
II орын – Көбесов Қайрат, Қаратау қаласы «Әбдірашит ата» мешіті;
III орын – Қосанов Даняр, Талас аудандық «Қаратау Қажы би» мешіті.
Алланың 99 көркем есімінен:
I орын – Итемген Нұрали Темірланұлы, Аққұм ауылы «Тұңғатар ата» мешіті;
II орын – Әбутали Ақылбек, Талас ауданы, Қаратау қаласы «Әбдірашит ата» мешіті;
III орын – Ізбас Аянат, Шәкиров ауылы «Байтоқты баба» мешіті.
