Сұрақ: Жамағат намаздарында имамға еру міндет пе?
Жауап: Дәстүрлі Исламда имам бес уақыт намаз, жұма намазы, айт намаздары, жаназа намаздарының рәсімін жүргізеді. Жамағатпен оқылатын намаздың негізгі шарттарының бірі – имамға еру. Имамға ұйыған адам ниет етіп «сәнә», «тәшаһһуд» сынды дұғаларын іштей айтып, фатиха мен қосымша сүрелерін оқымайды.
Елімізде Ханафи мәзһабы негізінде діни рәсімдер мен жоралғылар орындалады. Кейде мешіттерде имамға бағынбай, сүннет намаздарын, дұға сынды т.б. діни рәсімдерін орындамай сыртқа шығып кететіндер кездеседі. Ондай әрекеттер басқа намазхандарға кедергі келтіреді, имамға бағынбау дәстүрлі емес діни ағымдардың жетегінде жүргендерге тән қасиет.
Намаз барысында орындалатын іс-қимылдарда имамға еру – міндет. Имамға еру арқылы жамағаттың бірлігі сақталады, дінараздық дау-дамайдан аулақ болады.
Пайғамбарымыздың (с.а.у) хадисінде: «Кімде-кім имамға ұйып намаз оқыса, имамның қырағат етуі жеткілікті. Ал жеке оқығанда қырағат етсін» деген. Діни рәсімдерді орындау барысында діни сұрақтар туындаса, имамнан сұрағанымыз абзал.
Икрам АЙТАЕВ
