Ақтөбе қаласының Дін мәселелері және қоғаммен байланыс жөніндегі орталығының ұйымдастыруымен «Ұлттық тағам – ұлт мақтанышы» атты сайыс өтті.
Іс-шараның мақсаты қазақ халқының ұлттық тағамдарын, аспаздық өнері мен мәдениетін насихаттау болып табылады. Сайысқа қатысқан жас келіндер сайыстың алғашқы бөлімінде өздерін және арнайы әзірлеп алып келген қазақтың ұлттық тағамдарын таныстырды. Олар таныстыру барысында шығармашылдық пен креативтілікке мән беріп, тағамның жасалу ерекшеліктерін, дастархан мәдениетін барынша әдемі жеткізуге бар өнерлерін салып бақты.
Ұмытылып бара жатқан қазақтың ұлттық тағамдарының дайындалу процесі, бар өмірі дархан даланың төрт түлігімен байланысты дана халқымыздың құнарлы әрі дәмді тағамдарының ассортименті туралы мәліметтер айтылып, әзірлеген бейнероликтерін де көрермен назарына ұсынды. Сайыстың шешуші кезеңінде қатысушылар ұлттық тағамдар бойынша білім додасына түсті. Бірінші кезеңде «Кездейсоқ дөңгелектегі» сауалдарға жауап берсе, содан кейін бірнеше сөздердің арасынан жасырылған ұлттық тағамдардың атауын тауып, шапшаңдықтары сыналды.
Қызықты сайыстың қорытындысына сәйкес жүлделі 1 орын Сәуле Қазыбековаға бұйырып, ол шаңсорғыш иеленді. 2 орынды жеңіп алған Аида Кульжанова мен Мәдина Таңбаева аспазға қажет тұрмыстық бұйым – тоқ пешті болды. Ал Гулия Рамазановаға 3 орынның сыйлығы үтік бұйырды.
Әйелдер жамағатының ынтымағын, бірлігін арттырып, қазақтың ұлттық тағамдарының ерекшелігі мен құндылығын бағалауға, қазақ халқының қонақжай дәстүрін құрметтеуге тәрбиелеуде аталмыш сайыстың маңызы өте зор. Іс-шараға қатысушылар да өз кезегінде ұйымдастырушыларға алғыстарын жаудырып, көтеріңкі көңіл-күймен тарқасты.
Айгүл Канафия
Дін мәселелері және қоғаммен
байланыс жөніндегі
орталығының сектор меңгерушісі
