Сұрақ: «Бидғат» сөзін қалай түсінеміз?
Жауап: Қазіргі таңда зайырлылық құндылықтарды меңгермей, дін мен салт-дәстүрді сабақтастыра алмай мұсылмандар арасында «бидғат» мәселесін көтеріп жүрген діни топтар жиі кездеседі. Осындай әрекеттерімен олар мұсылман қоғамына дінараздық алауыздық отын тұтатады.
«Бидғат» сөзі «жаңалық», «жаңа ойлап табылған нәрсе» деген мағыналарда. Бидғатшы деп өз ойынан жаман пиғылмен шариғат бұйрығы деп әмір шығарушыларды айтады.
Исламтанушы ғалымдары бидғаттың екі түрін көрсетеді: Бидғат хасан (жақсы бидғат) және бидғат саий (жаман бидғат). Халық арасында бидғат туралы айтылғанда, көбіне бидғат саий, яғни оның жағымсыз мағынасын меңзейді.
Бидғат хасан деп Исламның негізгі ұстанымдарына қайшы келмейтін, бірақ мұсылманның пайдасына жарайтын оқиға немесе пікір айтылады. Ғалымдар негізі дінімізде болмаған қандай да бір істі жасау жаман жаңашылдық саналады, оған тыйым салынады, ал негізі дінімізде болған қандай да бір істі жасау – жақсы жаңашылдық деген.
Өткізілетін діни-рухани тәрбиелік іс-шаралар бидғат санатына жатпайды.
Икрам АЙТАЕВ
