Сұрақ: Менің Құрбан шалғым келеді. Бірақ оған мүмкіндігім жоқ. Не істесем болады?
Жауап: Құрбан – араб тілінде «жақындау» деген мағынаны білдіреді. Яғни, сауап істер арқылы Аллаға жақындау. «Кәусәр» сүресінің «Сен де, Раббың үшін намаз оқы да, құрбан шал!» деген екінші аяты негізінде Ханафи мәзһабы бойынша құрбан айт күндері құрбан шалу уәжіп. Құрбандыққа қой, ешкі, ірі қара немесе түйе шалынады.
Ал құрбандық шалу кімге уәжіп? Мұсылман болуы, ақыл есі дұрыс, балиғат жасына толған болуы, Құрбан айт уақытында жолаушы болмауы, Негізгі қажеттілік заттарынан артық мал-мүлкі немесе ақшасы бар болу қажет.
Шариғатта жағдайы келмейтін кісілерге құрбандық шалу міндеттелмейді. Қарызданып болса да, құрбандық шалсын деген шариғаттың талабы жоқ. Мұсылман адам амалымен жете алмайтын сауапқа ниеті арқылы жетеді. Әркімнің ісі ниетіне қарай бағаланады.
Мұсылманға ниеттенген нәрсесінің сауабы беріледі. Даналы сөздерде «мүміннің ниеті амалынан қайырлы», «жақсы ниет – жарым ырыс» дегендей алдағы уақыттарға жақсы амалдарға ниеттену – қайырлы іс. Сол себепті құрбандық шалуға шамасы жоқ адам, шамасы болған кезде, алдағы құрбан айт күндеріне ниеттеніп орындаса болады.
Икрам АЙТАЕВ
