Бұрын жер көлемі жөнінен әлемде Қазақстаннан кейін 10-орын алатын Судан мемлекеті 2011 жылы екіге бөлініп кетіп, Оңтүстік Судан мемлекеті пайда болған еді. Солтүстік Судан халқының 95 пайызы мұсылмандар болса, Оңтүстік Судан халқы – негізінен христиандар.
Сол кезден бері Солтүстік Суданның ішінде қарулы қақтығыстар тоқтамай, енді оның өзі тағы бірнеше бөлікке ыдырау алдында тұр. Бір-бірімен соғысып жатқан генералдар ел аумағында екі үкімет құрылатынын жариялады. Қарулы күштердің қолбасшысы Абдел Фаттах әл-Бұрханмен қақтығысқа түскен Жедел әрекет ету күштерінің көшбасшысы Мұхаммед Хамдан Дагало өзіне бағынышты аумақта азаматтық әкімшілік құратынын айтты. Генерал әл-Бұрхан да Порт-Суданда өтпелі үкімет құруға кірісіп кетті. Ел астанасы Хартум соғысып жатқан тараптардың майдан аймағына айналғандықтан, елордалық рөлін орындай алмай қалды.
“Біз соғыс қарсаңында тұрмыз. Егер қақтығыстарды тез арада шеше алмасақ, Судан бөлшектеледі” деп мәлімдеді әл-Бұрхан.
