Сұрақ: Жалпы дінді тек жақсылыққа шақырады деп білеміз, бірақ, БАҚ-та «діни экстремизм», «діни терроризм» деген сөздерді жиі естиміз. Бұл сонда қалай болғаны?
Жауап: Өкінішке орай кейбір азаматтар немесе діни ұйымдар діннің атын жамылып шынайы дінді емес, бәлкім теріс мүдделерді көздейді. Қоғамды «біз» және «басқалар» деп екіге бөледі. Дінге жаңадан қадам басқан адам көп жағдайда дұрыс діни тәлім алмауы себепті радикалды бағытты ұстанып кетеді. Себебі шынайы діндегі құндылықтарды қате түсініп, діни ұстанымы, дүниетанымы өзгереді.
Діндегі ақ пен қараны ажырата алмағандықтан псевдошейхтерге еріп, экстремистік көзқарасты қолдайды. Ол адам өзінің экстремистік ұстанымда екенін білмеуі де мүмкін, бірақ оны басқарып отырған топ немесе ағым жетекшісі оны экстремистік немесе террористік мақсатта қолдануы әбден мүмкін.
Осындай радикалды топ мүшесінің бойында діннің элементтері көрінген соң қоғам оны діни экстремист деп атайды. Ал діни экстремизм – террористік іс-әрекеттердің туындауына себеп болатын саяси құрал.
Бүгінде көптеген өздерін «діни бағытқа» жатқызатын экстремистік топтардың негізінен шынайы дінге еш қатысты жоқ екенін көріп отырмыз. Бар болғаны діннің шапанын жамылып, діни кұндылықтарға (бейбіт өмір, әділдік, отбасы құндылықтары, әлсізге көмек беру, зорлық қылмау, бейкүнә адамды өлтірмеу және т.б.) қарсы амал етіп отыр.
Олардың басты мақсаттарының бірі де сол – қоғамда үрей тудыру. Бірақ экстремистік, терроритсік «діни ұйымдардың» бұл әрекеттерін жалпы дін дұшпандары мен қарсыластары дінге қарсы тиімді пайдалануда деп айтар едім.
Жалғас САДУАХАСҰЛЫ
