2025 жылғы қазанда атысты тоқтату туралы келісім күшіне енгеннен бері Израильдің шабуылдарынан Газа секторында 1498 палестиналық көз жұмған.
Израиль армиясының Газа секторына соңғы 24 сағат ішінде жасаған шабуылдарынан жеті палестиналық қаза тауып, тағы жетеуі жарақат алды.
Бұл туралы Палестинаның Газа секторындағы Денсаулық сақтау министрлігі хабарлады. Ведомство 2023 жылғы қазаннан бері жалғасып келе жатқан Израиль шабуылдарынан зардап шеккендер жөніндегі жаңартылған мәліметтерді жариялады.
Министрліктің мәлімдеуінше, соңғы тәулікте Газа секторындағы ауруханаларға қаза тапқан жеті адамның денесі жеткізілген. Тағы жеті адам жарақат алған.
Ведомствоның дерегінше, 2025 жылғы қазанда атысты тоқтату туралы келісім күшіне енгеннен бері Израиль шабуылдарынан қаза тапқан палестиналықтардың саны 1498-ге жеткен. Ал жараланғандар саны 5306 адамды құрайды.
Осы кезеңде қираған ғимараттардың үйінділері астынан 838 адамның мәйіті шығарылған.
Министрліктің мәліметінше, 2023 жылғы қазанда Израиль шабуылдары басталғалы бері Газа секторында қаза тапқан палестиналықтардың жалпы саны 74 389 адамға жеткен. Тағы 175 423 адам жарақат алған.
Сонымен қатар Газа секторындағы қираған ғимараттардың үйінділері астында әлі де мыңдаған адамның мәйіті жатқаны хабарланды.
