Шабуа провинциясындағы Әл-Алам әскери оқу-жаттығу лагеріне баллистикалық зымырандармен соққы жасалды. Зардап шеккендердің нақты саны әзірге ресми түрде жарияланған жоқ.
Йемендік БАҚ-тың хабарлауынша, Иран қолдайтын хуситтердің Шабуа провинциясындағы Әл-Алам әскери оқу-жаттығу лагеріне баллистикалық зымырандармен жасаған шабуылы салдарынан 50-ден астам адам қаза тауып, жараланған.
Жергілікті ақпарат көздерінің мәліметінше, бүгін хуситтер Шабуа провинциясында орналасқан Әл-Алам лагеріне бірнеше баллистикалық зымыран ұшырған.
Шабуыл салдарынан 50-ден астам адамның қаза тауып, жараланғаны хабарланды.
Қауіпсіздік күштерінің қатарына қосылуға дайындалып жатқан жас сарбаздар жаттығатын лагерьге соққы жасалғаннан кейін Шабуа бас ауруханасының жедел жәрдем бөлімі зардап шеккендерге лық толған.
Жараланғандарға көмек көрсету үшін жергілікті тұрғындарға шұғыл түрде қан тапсыру жөнінде үндеу жасалды.
Жергілікті билік пен денсаулық сақтау органдары қаза тапқандар мен жараланғандардың нақты саны туралы әзірге ресми мәлімет жариялаған жоқ. Зардап шеккендерді ауруханаларға жеткізу жұмыстары әлі де жалғасып жатқаны атап өтілді.
Йеменде азаматтық соғыс жалғасып келеді. Қақтығыс 2014 жылдың қыркүйегінде Иран қолдайтын хуситтер ел астанасы Сана қаласы мен бірқатар провинцияны бақылауына алғаннан кейін басталған. Ал 2015 жылдың наурызынан бері Сауд Арабиясы бастаған араб елдерінің коалициясы Йеменнің халықаралық деңгейде мойындалған үкіметіне қолдау көрсетіп келеді.
