Сұрақ: Жаңбыр жаууында хикмет бар ма?
Жауап: Құранда табиғатты көркем етіп жаратқандығы жайлы аяттар көп. Алланың жаратқан дүниелерінде хикметтер мол. Оның берген нығметтерінің бірі – жаңбыр.
Жаңбыр арқылы жер жанданып, өсімдіктер өсіп, адамдар мен жануарлар сусынданады. Ал, кейбір адамдар жаңбыр бізге қолайсыздық әкелді деп, налып, қарғыс айтып жатады. Бұл дұрыс амал емес. Бірақ оның артында біз білмейтін хикмет болуы мүмкін.
Жаңбыр жауғанда «Аллаға шүкір» деп, берекелі жаңбыр болуын тілеген жақсы амал. «Рум» сүресінің 48-аятында: «Алла әуелі желдерді естіртеді, сөйтіп (Оның құдірет күшімен) ескен желдер бұлттарды қозғалысқа келтіреді. Алла ол бұлттарды көк кеңістігіне Өз қалауы бойынша жаяды, кейде түйдек-түйдек етіп ыдыратады. Нәтижесінде бұлттардың арасынан жауынның жауғанын көресің» десе, «Зүмәр» сүресінің 21-аятында: «Көрмеймісің, Алла аспаннан жауын жаудырып, оны жердегі қайнарларға қарай ағызуда. Кейін сол арқылы алуан түсті егін шығаруда. Содан соң сол егіннің сарғайып, солып қалғанын өз көзіңмен көресің. Ол содан кейін оны қу сабан мен қиқымға айналдыруда», деп баяндалған.
Жаңбыр Алланың нығметтерінің бірі екен, оған шүкіршілік етіп, береке тілеу саналы адамның ісі болмақ.
Икрам АЙТАЕВ
