Мәдениет және ақпарат министрлігінде 2026 жылдың алғашқы жартыжылдығындағы Ұлытау, Жетісу, Ақмола, Ақтөбе және Батыс Қазақстан облыстарының мәдениет саласындағы жұмыс қорытындылары қаралды.
Ұлытау облысында Жошы хан тарихи-мәдени кешенін дамытуға басымдық берілген. Биыл кешен облыстық тарихи-археологиялық музейдің теңгеріміне өтті. Жарты жыл ішінде архив құжаттарының 1,4 миллионға жуық беті цифрландырылып, бұл көрсеткіш былтырғы сәйкес кезеңмен салыстырғанда 36 пайызға артты. Сонымен қатар екі нысанда археологиялық зерттеу жүргізіліп, үш ескерткіште реставрация жұмыстары қолға алынды.
Ақмола облысы Creative Aimaq республикалық жобасына алғашқы болып қатысты. Жәрмеңкеге 200-ден астам қолөнерші, дизайнер, суретші, стартапер және креативті бизнес өкілі жиналды. Өңірде алты инфрақұрылымдық жоба жүзеге асырылып жатыр. Бір ауылдық клуб пайдалануға беріліп, жыл басынан бері 18 шығармашылық үйірме ашылды. Жыл соңына дейін тағы 25 үйірмені ашу жоспарланған.
Ақтөбе облысында алты ай ішінде 18 мыңнан астам мәдени іс-шара өткізіліп, оған 1,7 миллионнан астам адам қатысты. Өңірде төрт мәдениет нысанының құрылысы жүргізіліп, тағы үш нысанға күрделі жөндеу жұмысы жасалып жатыр. Сонымен бірге «Жыраулар жолымен…» жобасы аясында 36 жыршы «Қырымның қырық батыры» эпикалық туындысын 24 сағат бойы үздіксіз орындап, бұл жетістік Халықаралық рекордтар кітабына енді.
Жетісу облысында алғашқы жартыжылдықта төрт ауылдық мәдениет үйі ашылды. Жыл соңына дейін тағы бес мәдениет үйі мен аудандық кітапхананы пайдалануға беру көзделген. Облыстық филармония жанынан камералық хор құрылып, Бикен Римова атындағы академиялық драма театрдың репертуары бес жаңа қойылыммен толықты. Сегіз аудан мен екі қалада жүргізілген экспедиция барысында материалдық емес мәдени мұраны сақтап келе жатқан 124 өнер иесі анықталды.
Сондай-ақ Жаркент мешітін басқару жоспарын әзірлеу жалғасып жатыр.
Батыс Қазақстан облысында 25 ауыл кітапханасы жаңғыртылып, ғимараттары жөнделіп, заманауи құрал-жабдықтармен қамтамасыз етілді және кітап қоры толықтырылды. Ғылыми реставрациядан кейін А.Н. Островский атындағы театр тарихи ғимаратына қайта оралды. Ал Хадиша Бөкеева атындағы театр жаңа маусымын жаңартылған сахнада бастайды. Ғарифолла Құрманғалиев атындағы облыстық филармонияға «академиялық» мәртебесі берілді. Осыған байланысты 2026 жылдың екінші жартысынан бастап мекеме қызметкерлерінің лауазымдық жалақысына 50 пайыздық үстемақы белгіленді.
Сондай-ақ Жастар сарайы базасында «ÓzgeEpic Oral» креативті хабы ашылды. Жиында өңірлердің атқарған жұмыстары ғана емес, ауылдық мәдениет ұйымдарын жаңғырту, кадрлық әлеуетті нығайту, музей мен архив қорларын цифрландыру, археологиялық зерттеулер мен ғылыми-реставрациялық жұмыстарды жалғастыру мәселелері де талқыланды. Екінші жартыжылдықта өңірлерде мәдениет нысандарының құрылысы мен жөндеу жұмыстары жалғасады. Музей экспозицияларын жаңарту, шығармашылық жобаларды жүзеге асыру, дәстүрлі орындаушылардың байқаулары мен театр және музыка фестивальдерін өткізу жоспарланған.
Олардың қатарында «Дәнеш дауысы», «Жайық сазы», «Ұлытау үні», «Жезкиік» және Flamingo Fest фестивальдері бар. Жиын қорытындысында өңірлерге Мемлекет басшысы, Қазақстан Республикасы Үкіметі және Мәдениет және ақпарат министрлігі жүктеген тапсырмалардың сапалы әрі уақытылы орындалуын қамтамасыз ету, екінші жартыжылдыққа жоспарланған жобаларды мерзімінде аяқтау және көтерілген мәселелер бойынша тиісті шаралар қабылдау тапсырылды. Тапсырмалардың орындалуы Мәдениет комитетінің бақылауында болады.
