Сұрақ: Арабтардың киімін кию сүннет пе?
Жауап: Әлемде елу жетіге жуық мұсылман елі бар. Әр ұлттың өзіне тән киім кию мәдениеті қалыптасқан. Ұлттық киім үлгісі өздері мекендеген ортаның табиғатына, ауа райына сәйкес болып келетіні белгілі.
Арабтардың да өздеріне тән ұлттық киім кию үлгісі қалыптасқан. Киім үлгісі араб халқының мәдениеті мен дәстүріне жатады. Олардың жүріс-тұрысы мен киім үлгісі діни сүннет емес. Ислам діні белгілі бір ұлттың киімін міндеттемейді.
Киімге қатысты жалпы шариғи талаптар бар. Шариғаттың талаптары – әурет жерлерін жабу. Ер кісілер кіндік пен тізе арасын жабуы, әйелдер бет, қол мен тобықтан басқа барлық дене мүшесін жабуы міндет.
Сондай-ақ, ұлттық киімдер шариғат талаптарына қайшы келмесе, оны киюдің еш әбестігі жоқ екен. Қазақстан мұсылмандары діни басқармасы ұлттық мәдениетке қайшы келмейтін, ұятты жерді жабатын кез келген киімді киюге болатынын айтқан.
«Аъраф» сүресінің 26-аятында: «Ей, Адам ұрпақтары! Сендерге ұятты жерлеріңді жабатын киім түсірдік әрі сәндік киімдерді де. Ал, тақуалық киімі қайырлы. Бұл олардың еске алуы үшін Алланың белгілерінен», деген.
Демек, сүннет деп араб және басқа ұлттардың киіміне еліктемей, өз ұлттық мәдениетімізді білдіретін киімді кию абзал екен.
Икрам АЙТАЕВ
