Сұрақ: Ер мен әйелдің беттен сүйіп амандасуы дұрыс па?
Жауап: Исламда амандасудың өзіндік қалыптасқан әдебі бар. Үйленбеген, араларында ешқандай туыстық (махрамдық) байланысы жоқ ер мен әйелдің сүйісіп көрісуі құпталмайды. Дәстүріміздебір-бірімен кездескенде, ер адамдар жағы «Ассаламу алейкум», «уағалейкумассалам» деп қол алысып амандасса, әйелдер жағы «аман-есенсіз бе?», «сәлеметсіз бе?», «шүкіршілік» деп, өзара сыйластық пейілмен көрісетін болған.
Сондай-ақ бейтаныс немесе алыс жүрген адамдармен тек қашықтан бас изеп немесе оң қолды жүрек тұсына қойып сәлемдесу әдебі де бар. Жақындар арасында ата-әжелер, ата-аналардың немерелерін немесе кішкентай балаларды беттен сүйіп, маңдайынан иіскеуі қалыпты жағдай.
Ал ер мен әйел немесе ер адамдар өзара бет сүйісіп, құшақтасып амандасуы әдепке сай емес.
Исламда сәлем беру – сүннет, ал біреудің сәлемін алу – уәжіп (міндет). «Ниса» сүресінің 86-аятында: «Сендерге сәлем беріліп, игі ниет білдіргенде, сендер одан да артық ниет білдіріп, одан да жақсы сәлем беріңдер немесе жоқ дегенде дәл солай сәлем қайтарыңдар», деген.
Демек, өзге мәдениетке еліктемей, дәстүріміздегі қалыптасқан амандасу әдебін сақтау саналы адам ісі екен.
Икрам АЙТАЕВ
