Ресейдегі атақты дәрігер, офтальмолог Эрнст Мулдашев Тибетке барғанында, бір дін ғұламасынан Алланың мейіріміне бөлену үшін, әлемнің бұзылмауы үшін не істеуіміз керек деп сұраған екен.
Сонда әлгі ғалым:
“Әлемде үш түрлі махаббат болады.
Біріншісі – ананың баласына деген махаббаты.
Екіншісі – ерлі-зайыптылардың махаббаты.
Үшіншісі – өз ұлтына, адамзатқа деген махаббат.
Бізде сол үшінші махаббат жетпей жатыр. Сондықтан, өмір сүрген еліңіз де, бүкіл әлем де тыныштық таба алмауда”, деп жауап беріпті.
Абай хәкім бабамыз да:
“Махаббатпен жаратқан адамзатты,
Сен де сүй ол Алланы жаннан тәтті.
Адамзаттың бәрін сүй бауырым деп,
Және хақ жолы осы деп әділетті”, деп дәл осыны айтып кеткен еді ғой.
Ал, Пайғамбарымыз ( с.а.с): “Сендер иман етпейінше, жәннатқа кірмейсіңдер; бір-біріңді сүймейінше, шын мағынада иман еткен бола алмайсыңдар. Осыны жасаған жағдайда бір-бірлеріңді жақсы көре алатын (бір-бірлеріңе деген сүйіспеншілікті арттыратын) амалды айтайын ба? Араларыңда сәлемді жайыңдар ”, деп бұйырған болатын. (Мүслім)
Иә, қазіргі құндылықтардың орны ауысып жатқан уақытта, барша адамзатқа бір-біріне, адамзатқа деген мейірім жетпей жатқаны ақиқат.
Эрнст Мулдашев айтпақшы, әрбір қалада, әрбір ауылда “Сәлемдесу аллеясын, көшесін” ашып қойса, дұрыс болады деп ойлаймын. Сол аллеяда әркім бір-бірімен амандасып жүрсе, нұр үстіне нұр болмай ма?
Алла баршамызға, адамзатқа мейірім, береке-бірлік берсін!
Қуат ҚАБДОЛДА
