Сұрақ: Жаңа айды көргенде не айту керек?
Жауап: Мұсылман жыл санауы һижри жылмен өлшенеді. Һижри күнтізбесі күнмен емес, жаңа туған ай арқылы есептелінеді.
Қазақ дәстүрінде жаңа айды көргенде «Ай көрдік, аман көрдік. Ескі айда есірке, Жаңа айда жарылқа!» деп дұға айтатын.
Ал, Ислам дәстүрінде жаңа айды көргенде оқылатын өзіндік дұғасы бар. «Пайғамбарымыз (с.а.у.) жаңа туған айды көргенде: «Уа, Алла Тағалам! Бұл айды біз үшін тыныштық, имандылық, есендік және Ислам айы ете гөр! Менің де, сенің де Раббың бір Алла! Уа, тура жол мен игілік айы» деп дұға жасайтын» деген.
Исламда Һижри айларының өзіндік орны бар. Аталған айларда адамдарды тақуалық пен игілікке бастайтын қажылық (зул-хиджа) пен ораза (рамазан) секілді маңызды құлшылықтардың уақыты жаңа туған ай арқылы белгілі болады. Демек, жаңа туған айды көргенде дұға жасау дінімізде бар амал.
Икрам АЙТАЕВ
