Қазалы ауданына қарасты Ғани Мұратбаев ауылында мешіттің жаңа ғимараты ел игілігіне берілді. Ашылу рәсіміне Қызылорда облысының бас имамы Дастан Құрманбаев, аудан әкімі Алмасбек Есмаханов және ауыл тұрғындары қатысты.
Қасиетті Құран аяттарымен басталған салтанатты шарада облыстың бас имамы мен аудан әкімі құттықтау сөз сөйлеп, жаңа мешіт халықтың рухани жаңғырып өркендеуіне үлес қосатын, жастарды жақсы бағытта тәрбиелеуге үлкен мүмкіндік беретін орын екенін жеткізді.
Игі шарада «Қуандық Әулие» атындағы жаңа мешіттің салынуына үлес қосқан ауыл азаматтарына аудан әкімнің және облыстың бас имамының «Алғыс хаты» табысталды. Лента қию рәсімінен соң мешітте Құран хатым дұғасы жасалып, сауабы дүниеден өткен ата-баба рухына бағышталды.
Айта кетейік, Ғани Мұратбаев ауылындағы «Қуандық Әулие» атындағы мешіттің көне ғимараты 2003 жылы ашылған болатын. Мешіттің ескіруіне байланысты бүгінде ауыл азаматтарының ауызбірішілігімен жаңа мешіт бой көтерді.
Мешіт сыйымдылығы 130 адамға шақталған. Үлкен күмбезінің биіктігі 5 метр болса, кіші күмбезінің биіктігі 3 метр. Ал мұнара биіктігі 7 метр. Жанынан 150 адамдық асхана салынуда.
ҚМДБ-ның Қызылорда облысы бойынша өкілдігінің баспасыз қызметі
