9 қарашада Алматыдағы “Перзент” балалар үйі өртеніп кетті. Мәліметтерге қарағанда, балалар үйінің моншасы, асханасы, мекеме басшысы Әмина қажының тұратын жері, қоймасы жанып кеткен. Болжам бойынша, өрт асханадан басталған.
Тәрбиеленушілер дер кезінде эвакуацияланып, қауіпсіз жерге шығарылған.
“Перзент” қайырымдылық балалар үйі бірнеше жетім балаларды бауырына басқан Әмина апаға тиесілі. Артынша ол кісі әлеуметтік желіде мәлімдеме жасап, балалар үйіне деп ешқандай ақша жинамау туралы айтты. Өйткені осы жағдайды пайдаланып, алаяқтар да адамдарды алдап кетуі мүмкін деген қаупін жасырмады. “Ақша керек болып жатса, өзім айтамын” деді ол.
Әмина қажы балалардың бәрі дін аман екенін, үстеріне бір киімдерін киіп алып, далаға шыққандарын және қауіпсіз жерге көшірілгенін жеткізді.
