Сұрақ: Қандай жағдайларда ғұсыл алынады?
Жауап: Ислам – тазалық діні. Барлық құлшылық амал дәретпен орындалады. «Ғұсыл» сөзі жуыну, шомылу деген мағынаны білдіреді. Діндегі жалпы мағынасы – бүкіл дененің толық жуылуын береді.
Ханафи мәзһабында ғұсылдың парызы үшеу: ауызды сумен шаю, мұрынға су тарту, толық тұла бойын сумен жуу.
Мынадай жағдайларда ғұсыл алу қажет болады: жүніп болғанда (денеден сұйықтық бөлінгенде), ерлі-зайыптылар арасында жыныстық қатынастан кейінгі жағдайда, әйел затының бойындағы хайыз бен нифас кезеңі аяқталғанда, мәйітті жууда, жаңа исламды қабылдап, мұсылман болғанда.
«Маида» сүресінің 6-аятында: «Егер жүніп болсаңдар, толық тазаланыңдар» десе, «Ниса» сүресінің 43-аятында: «Тазаланбастан, жүніп күйінде намаз оқымаңдар» деген.
Икрам АЙТАЕВ
