Сұрақ: Кісі айыбын ашу күнә ма?
Жауап: Адам кемшіліксіз болмайды. Кемшілігін байқаған кісі өзін түзеп отыруы қажет. Күнделікті өмірде бірге жүрген жандардың байқаусызда жасаған қателіктерін жұртқа жаймай, ешкімнен ілік іздемей, кемшілігін бетіне баспай, оны жасыра білу – адамгершілік қасиеттен. Яғни, мұндай іс-әрекет адами мінезге жатады.
Пайғамбарымыз (с.а.у.) өзінің өмір тағылымында ешкімнің қателігін көзіне шұқып көрсетіп, айыбын ашып, бетіне басқан емес. Керісінше жаман әдеттерден арылту үшін көркем мінезбен қайтарып отырған. Ал адамға, қоғамға зияны тиетін жаман қасиеттермен іс-әрекеттерден сақтандыру мақсатында айтылан сөз күнәға жатпайды.
«Хужурат» сүресінің 12-аятында: «Әй иман еткендер! Бір-біріңді аңдымаңдар (кемшілік іздемеңдер)» деп, жаман әдеттерден қайтарған. Пайғамбарымыз (с.а.у.) хадистерінде: «Кім бір мұсылманның айыбын жасырса, Алла да сол адамның қиямет күні айыбын жасырады», «Діндес бауырын бір кінәсі үшін айыптаған адам сол күнәні өзі де істемейінше өлмейді» деген.
Демек, Исламда біреудің нахақтан айыбын ашу ауыр күнә екен. Барынша адамға жақсылық жасау қайырлы амалдығын ұмытпаған абзал.
Икрам АЙТАЕВ
