Сұрақ: Қандай үлкен күнәлардан сақтанғаным дұрыс?
Жауап: Ислам дінінде күнәлардың түрлері анықталып, одан сақтануға бұйырылған. Бұл әр мұсылманға міндет. Адам күнәлардан арылмаса, жүрегі қарайып, жұмысының берекесі болмай, құрдымға кетеді.
Әрбір мұсылман сақтануға тиіс мынадай үлкен күнәлар бар: Аллаға серік қосу, ата-анаға қарсы келу, адам өлтіру, зина жасау, мал-мүлікті тонау, жетімнің ақысын жеу, ішімдік ішу, есірткі қолдану, сиқырмен айналысу, өз-өзіне қол жұмсау, жалған куәлік беру, өсек тарату, т.б.
Адамның нәпсісі оны үнемі жамандыққа итермелеп тұрғандықтан, жаза басып, қателеспеуі мүмкін емес. Алайда Алла адам баласына күнәсынан арылып, таза болуы үшін, тәубе есігін ашқан. Адам күнәларын біліп, тәубеге келіп, шын жүрекпен өкініп, Алланы еске алып жүректі тазартып, нәпсісіне ие болғаны абзал.
«Бақара» сүресінің 222-аятында: «…Шүбәсіз, Алла (пендешілікпен істелген күнәнің артынша) қатты өкініп тәубе ететін тәубешіл құлдарын және үнемі (күнә атты рухани кірлерден) тазаланушыларды жақсы көреді» деген.
Жақсы амалдармен Алланың ризашылығына бөлене берейік.
Икрам АЙТАЕВ
