Астана қаласында «Жасанды интеллект: діни білім алудың заманауи мәселелері» тақырыбында тәжірибелік семинар өтті. Шараны Астана қаласының Дін істері жөніндегі басқармасының қолдауымен «QAMQOR-ASTANA» қоғамдық қоры ұйымдастырды.
Семинар ҚР 2023–2025 жылдарға арналған экстремизм мен терроризмге қарсы іс-қимылдың кешенді жоспары аясында өтті. Негізгі мақсат – ақпараттық-түсіндіру тобы мүшелерінің біліктілігін арттырып, заманауи технологияларды, әсіресе жасанды интеллект мүмкіндіктерін тиімді қолдануға үйрету.
Аталған семинарға ҚМДБ Жастар ісі секторының меңгерушісі Бағыжан Күзекбай қатысып, Астана қаласы әкімінің орынбасары Е. Байкен бекіткен ақпараттық-түсіндіру тобы құрамына ресми түрде енді.
Семинар барысында ақпараттық кездесулерді тиімді ұйымдастыру жолдары, тыңдаушылардың діни сауаттылығын арттыруға арналған жаңа тәсілдер мен заманауи құралдарды қолдану мәселелері талқыланды.
